Kota Srinivasa Rao: ‘ನಮ್ಮ ಬಸವ’ ಸೇರಿ 750ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದ ಹಿರಿಯ ನಟ ನಿಧನ..!

ಹೈದರಾಬಾದ್:ತೆಲುಗು ಸಿನಿಮಾ ರಂಗಕ್ಕೆ ಮತ್ತೊಂದು ದೊಡ್ಡ ಆಘಾತ – ಖ್ಯಾತ ಹಿರಿಯ ನಟ ಕೋಟ ಶ್ರೀನಿವಾಸ ರಾವ್ ಇಂದು ಮುಂಜಾನೆ (ಬೆಳಗ್ಗೆ 4 ಗಂಟೆ) ಹೈದರಾಬಾದ್‌ನ ತಮ್ಮ ನಿವಾಸದಲ್ಲಿ ನಿಧನರಾಗಿದ್ದಾರೆ. ಅವರಿಗೆ 83 ವರ್ಷ ವಯಸ್ಸಾಗಿತ್ತು. ಕೆಲವು ದಿನಗಳಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದರು.

ವೃದ್ಧಾಪ್ಯದ ಕಾರಣದಿಂದ ನಡೆಯಲು ಸಾಧ್ಯವಾಗದಿದ್ದರೂ ಸಹ, 2023ರವರೆಗೂ ಅವರು ನಟನೆಯಲ್ಲೇ ಸಕ್ರಿಯರಾಗಿದ್ದರು. ‘ಸುವರ್ಣ ಸುಂದರಿ’ ಎಂಬ ಚಿತ್ರವೇ ಅವರ ಕೊನೆಯ ಸಿನಿಮಾಗೆ ಆಗಿದೆ. ನಾಲ್ಕು ದಶಕಗಳ ಸುದೀರ್ಘ ಚಲನಚಿತ್ರ ಜೀವನದಲ್ಲಿ ಕೋಟಾ ಶ್ರೀನಿವಾಸ ರಾವ್ ಅಸಂಖ್ಯಾತ ಅಪ್ರತಿಮ ಪಾತ್ರಗಳನ್ನು ನಿರ್ವಹಿಸಿ ಸಿನಿಪ್ರೇಮಿಗಳ ಮನಗೆದ್ದಿದ್ದರು.

ತಮ್ಮ ಅನನ್ಯ ಅಭಿನಯ ಶೈಲಿಯಿಂದ 750ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಕಾಣಿಸಿಕೊಂಡು, ತೆಲುಗು ಮಾತ್ರವಲ್ಲದೆ ತಮಿಳು, ಕನ್ನಡ, ಮಲಯಾಳಂ ಮತ್ತು ಹಿಂದಿ ಭಾಷಾ ಚಿತ್ರಗಳಲ್ಲಿಯೂ ತಮ್ಮ ಕಲೆ ಪ್ರದರ್ಶಿಸಿದ್ದರು. ಕನ್ನಡ ಚಿತ್ರಗಳಲ್ಲಿ ‘ನಮ್ಮ ಬಸವ’, ‘ರಕ್ತ ಕಣ್ಣೀರು’ ಸೇರಿ ಹಲವು ಚಿತ್ರಗಳಲ್ಲಿ ಅವರು ನಟಿಸಿದ್ದರು.

ವೈದ್ಯನಾಗಬೇಕೆಂದ ಕನಸು – ಆದರೆ ಕಲೆಯ ಲೋಕದ ಕೂಗು ಹೆಚ್ಚು

ಕೋಟಾ ಶ್ರೀನಿವಾಸ ರಾವ್ 1942ರ ಜುಲೈ 10 ರಂದು ಆಂಧ್ರಪ್ರದೇಶದ ಕಂಕಿಪಡುವಿನಲ್ಲಿ ಜನಿಸಿದರು. ಅವರ ತಂದೆ ಸೀತಾರಾಮಾಂಜನೇಯುಲು ಒಬ್ಬ ವೈದ್ಯರಾಗಿದ್ದು, ಬಾಲ್ಯದಲ್ಲಿ ಮಗನೂ ವೈದ್ಯನಾಗಬೇಕೆಂದು ಆಶಿಸಿದ್ದರು. ಆದರೆ ಶಾಲಾ ದಿನಗಳಲ್ಲಿ ನಾಟಕಗಳಲ್ಲಿ ಭಾಗವಹಿಸುತ್ತಿದ್ದ ರಾವ್ ಅವರಿಗೆ ಅಭಿನಯದ ಜಗತ್ತೇ ಹೆಚ್ಚು ಆಕರ್ಷಕವಾಯಿತು. ಪದವಿಗೆ ನಂತರ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ನಲ್ಲಿ ಉದ್ಯೋಗಕ್ಕೆ ಸೇರಿದ್ದರೂ, ಕೊನೆಗೆ ಕಲೆಯ ಪ್ರಪಂಚವೇ ಅವರ ನಿಜವಾದ ವೃತ್ತಿಯಾಗಿ ಪರಿಣಮಿಸಿತು.

ರಂಗಭೂಮಿ, ಸಿನಿಮಾ ಮತ್ತು ರಾಜಕೀಯ – ಮೂರು ಕ್ಷೇತ್ರಗಳ ಸಾಧಕ

ಅಭಿನಯ ಕ್ಷೇತ್ರದಲ್ಲಿಯಷ್ಟೇ ಅಲ್ಲ, ಕೋಟಾ ರಾಜಕೀಯದಲ್ಲಿಯೂ ತಮ್ಮ ಪಾದರಚನೆ ಮಾಡಿದ್ದರು. ಅವರು 1999ರಿಂದ 2004ರ ವರೆಗೆ ವಿಜಯವಾಡ ಪೂರ್ವ ಕ್ಷೇತ್ರದಿಂದ ಶಾಸಕರಾಗಿ ಸೇವೆ ಸಲ್ಲಿಸಿದ್ದಾರೆ.