LPG Price Surge: ದೇಶಾದ್ಯಂತ ಗ್ಯಾಸ್‌ ಸಿಲಿಂಡರ್‌ ದರ ಏರಿಕೆ! ಗೃಹಬಳಕೆ, ವಾಣಿಜ್ಯ ಬಳಕೆ ದರ ಎಷ್ಟಿದೆ?

LPG Price Surge: ದೇಶಾದ್ಯಂತ ಗ್ಯಾಸ್‌ ಸಿಲಿಂಡರ್‌ ದರ ಏರಿಕೆ! ಗೃಹಬಳಕೆ, ವಾಣಿಜ್ಯ ಬಳಕೆ ದರ ಎಷ್ಟಿದೆ?

 ಪ್ರತಿ ತಿಂಗಳಿನಂತೆ ಈ ತಿಂಗಳ ಮೊದಲ ದಿನದಂದು ಎಸ್‌ಪಿಜಿ ಗ್ಯಾಸ್‌ ಸಿಲಿಂಡರ್‌ ದರ ಪರಿಷ್ಕರಣೆಯಾಗಿದೆ. ಈ ಬಾರಿ ವಾಣಿಜ್ಯ ಬಳಕೆಯ ಗ್ಯಾಸ್‌ ದರ ಹೆಚ್ಚಳ ಮಾಡಿದ್ದು, 19 ಕೆಜಿ ಸಿಲಿಂಡರ್‌ ದರ 39 ರೂಪಾಯಿ ಏರಿಕೆಯಾಗಿದೆ.

ಉಳಿದಂತೆ ಗೃಹ ಬಳಕೆಯ 14.2 ಕೆಜಿ ಸಿಲಿಂಡರ್‌ ದರದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ. ಈ ಮೂಲಕ ಗೃಹಿಣಿಯರಿಗೆ ಗ್ಯಾಸ್‌ ಬೆಲೆ ಏರಿಕೆ ಬಿಸಿ ಇಲ್ಲದೆ ಸಮಾಧಾನವಾಗಿದೆ. ಸದ್ಯ ಬೆಂಗಳೂರಿನಲ್ಲಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್ ಬೆಲೆ 1,769 ರೂಪಾಯಿ ತಲುಪಿದೆ. ಇನ್ನು 47.5 ಕೆಜಿ ಸಿಲಿಂಡರ್‌ ದರ 4,420 ರೂ ಇದೆ.

ಇನ್ನು ಕಳೆದ ತಿಂಗಳುಗಳಲ್ಲಿಯೂ ಸಿಲಿಂಡರ್‌ ದರ ಇಳಿಕೆಯಾಗಿತ್ತು. ಆಗಸ್ಟ್‌ನಲ್ಲಿ 8.5 ರೂಪಾಯಿ. ಜುಲೈನಲ್ಲಿ 30 ರೂ., ಜೂನ್‌ನಲ್ಲಿ 69.50 ಮತ್ತು ಮೇ ತಿಂಗಳಿನಲ್ಲಿ 19 ರೂ. ಇಳಿಕೆಯಾಗಿತ್ತು. ಸೆಪ್ಟೆಂಬರ್‌ನಲ್ಲಿ ಬರೋಬ್ಬರಿ 39 ರೂಪಾಯಿ ಏರಿಕೆಯಾಗಿದೆ. ದೆಹಲಿಯಲ್ಲಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್ ಬೆಲೆ 39ರೂ.ಗಳಷ್ಟು ಹೆಚ್ಚಾಗಿದ್ದು, ಪೂರ್ಣ ಸಿಲಿಂಡರ್‌ ಬೆಲೆ 1,691.5 ರೂಪಾಯಿ ತಲುಪಿದೆ.

ಸಿಲಿಂಡರ್‌ ದರ ಏರಿಕೆಯಿಂದ ಹೋಟೆಲ್‌ ಉದ್ಯಮಗಳಿಗೆ ಹೊರೆಯಾಗಲಿದೆ. ಸತತವಾಗಿ ವಾಣಿಜ್ಯ ಸಿಲಿಂಡರ್‌ ದರ ಏರಿಕೆಯಾಗುತ್ತಿದ್ದು, ಖರ್ಚು ವೆಚ್ಚ ತಿಂಗಳಿಂದ ತಿಂಗಳಿಗೆ ಹೆಚ್ಚಾಗತ್ತಿದೆ. ಇದು ಹೋಟೆಲ್‌ಗಳ ದರಪಟ್ಟಿಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.

ಮುಂಬೈನಲ್ಲಿ ವಾಣಿಜ್ಯ ಸಿಲಿಂಡರ್ ದರ 1605 ರೂ. ಇತ್ತು. ಸದ್ಯ ಇದರ ಬೆಲೆ 1644 ರೂ. ತಲುಪಿದೆ. ಕೋಲ್ಕತ್ತಾದಲ್ಲಿ ಈ ಸಿಲಿಂಡರ್ ಬೆಲೆ 1764.50 ರೂ.ನಿಂದ 1802.50 ರೂ.ಗೆ ಏರಿಕೆಯಾಗಿದೆ. ಇನ್ನು ಬೆಂಗಳೂರಿನಲ್ಲಿ 1730 ರೂ. ಇದ್ದ ದರ 1769 ರೂಗೆ ಹೆಚ್ಚಳವಾಗಿದೆ.

ಅಂತಾರಾಷ್ಟ್ರೀಯ ತೈಲ ಬೆಲೆಗಳು, ತೆರಿಗೆ ನೀತಿಗಳು ಮತ್ತು ಪೂರೈಕೆ-ಬೇಡಿಕೆ ಅಂಶಗಳ ಆಧರಿಸಿ ಪ್ರಭಾವಿತವಾಗಿರುತ್ತದೆ. ಇತ್ತೀಚಿನ ಬೆಲೆ ಏರಿಕೆಯ ಹಿಂದಿನ ನಿಖರವಾದ ಕಾರಣ ಇಲ್ಲವಾದರೂ ತೈಲ ಮಾರುಕಟ್ಟೆ ಕಂಪನಿಗಳು ಬದಲಾಗುತ್ತಿರುವ ಮಾರುಕಟ್ಟೆ ಪರಿಸ್ಥಿತಿಗಳಿಗೆ ಅನುಗುಣವಾಗಿ ಬದಲಾವಣೆಯಾಗಿದೆ ಎನ್ನಲಾಗಿದೆ. ಇನ್ನು ಎಲ್‌ಪಿಜಿ ಬೆಲೆಗಳಲ್ಲಿನ ಹಠಾತ್ ಹೆಚ್ಚಳವು ರೆಸ್ಟೋರೆಂಟ್‌ಗಳು ಮತ್ತು ಹೋಟೆಲ್‌ಗಳಿಂದ ಹಿಡಿದು ಸಣ್ಣ-ಪ್ರಮಾಣದ ಕೈಗಾರಿಕೆಗಳವರೆಗೆ ವಿವಿಧ ವಲಯಗಳ ವ್ಯವಹಾರಗಳ ಮೇಲೆ ಹೊರೆಯಾಗಿ ಪರಿಣಾಮ ಬೀಳಲಿದೆ.

ವೆಬ್ ಡೆಸ್ಕ್
ಫೋಕಸ್ ಕರ್ನಾಟಕ