ಅಮೆರಿಕ ಅಧ್ಯಕ್ಷೀಯ ಚುನಾವಣೆ: ಕಮಲಾ ಹ್ಯಾರಿಸ್‌ಗೆ ಮುಸ್ಲಿಂ ಮತದಾರರಿಂದ ‘ಗಾಜಾ’ ತಿರುಗೇಟು?

ಅಮೆರಿಕ ಅಧ್ಯಕ್ಷೀಯ ಚುನಾವಣೆ: ಕಮಲಾ ಹ್ಯಾರಿಸ್‌ಗೆ ಮುಸ್ಲಿಂ ಮತದಾರರಿಂದ ‘ಗಾಜಾ’ ತಿರುಗೇಟು?

ಕಮಲಾ ಹ್ಯಾರಿಸ್ ಅವರಿಗೆ ಮತ ಹಾಕಬೇಡಿ! ಈ ರೀತಿಯಾದ ಒಂದು ಅಭಿಯಾನ ಶುರು ಮಾಡಿರೋದು ಅಮೆರಿಕದ ಮುಸ್ಲಿಮರು! ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೆಮಾಕ್ರೆಟಿಕ್ ಪಕ್ಷದ ಅಭ್ಯರ್ಥಿಯಾಗಿರುವ ಕಮಲಾ ಹ್ಯಾರಿಸ್ ಅವರನ್ನು ಮುಸ್ಲಿಂ ಮತದಾರರು ಬೆಂಬಲಿಸಬಾರದು ಎಂದು ಕರೆ ನೀಡಲಾಗಿದೆ. ಇಸ್ರೇಲ್ - ಗಾಜಾ ಸಂಘರ್ಷದ ವಿಚಾರದಲ್ಲಿ ಕಮಲಾ ಹ್ಯಾರಿಸ್ ಕೈಗೊಂಡಿರುವ ನಿಲುವುಗಳನ್ನು ಖಂಡಿಸಿ ಅಮೆರಿಕ ಮುಸ್ಲಿಂ ಮತದಾರರು ಈ ನಿರ್ಧಾರ ಕೈಗೊಂಡಿದ್ಧಾರೆ.

ಈ ಸಂಬಂಧ ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಅಭಿಯಾನವೇ ಶುರುವಾಗಿದೆ. ‘ಕಮಲಾ ಹ್ಯಾರಿಸ್ ಅವರನ್ನು ತ್ಯಜಿಸಿ’ ಎಂಬ ಹೆಸರಿನ ಪುಟದಲ್ಲಿ ಮನವಿ ಮಾಡಿಕೊಂಡಿರುವ ಅಮೆರಿಕದ ಮುಸ್ಲಿಂ ಮತದಾರರು, ಗಾಜಾ ಪಟ್ಟಿಯಲ್ಲಿ ಹಿಂಸಾಚಾರ ನಿಲ್ಲುವಲ್ಲಿ ಅಮೆರಿಕದ ಆಡಳಿತಾರೂಢ ಡೆಮಾಕ್ರೆಟಿಕ್ ಪಕ್ಷದ ಸರ್ಕಾರ ಯಾವುದೇ ಪೂರಕ ನಿಲುವು ಕೈಗೊಂಡಿಲ್ಲ. ಬದಲಾಗಿದೆ. ಇಸ್ರೇಲ್ ಸರ್ಕಾರದ ನೀತಿಗಳಿಗೆ ಪೂರಕವಾದ ನಿಲುವನ್ನು ಕಮಲಾ ಹ್ಯಾರಿಸ್ ಕೈಗೊಂಡಿದ್ದಾರೆ. ಕಮಲಾ ಹ್ಯಾರಿಸ್ ಅವರು ಗಾಜಾ ಪಟ್ಟಿಯಲ್ಲಿನ ಜನತೆಯ ರಕ್ಷಣೆಯ ಪೂರಕವಾಗಿ ಯಾವುದೇ ನಿಲುವು ವ್ಯಕ್ತಪಡಿಸಿಲ್ಲ ಎಂದು ಅಮೆರಿಕದ ಮುಸ್ಲಿಂ ಮತದಾರರು ಆಕ್ರೋಶ ಹೊರ ಹಾಕಿದ್ದಾರೆ.

ಅಮೆರಿಕದಲ್ಲಿ ಮುಸ್ಲಿಂ ಸಮುದಾಯದ ಬಾಹುಳ್ಯ ಹೊಂದಿರುವ ಡರ್ಬನ್ ಹಾಗೂ ಮಿಚಿಗನ್ ನಗರಗಳಲ್ಲಿ ಕಮಲಾ ಹ್ಯಾರಿಸ್ ವಿರುದ್ಧ ಅಭಿಯಾನ ನಡೆಯುತ್ತಿದೆ. ಈ ಮುನ್ನ ಅಮೆರಿಕದ ಹಾಲಿ ಅಧ್ಯಕ್ಷ ಜೋ ಬೈಡನ್ ಅವರು ಪುನರಾಯ್ಕೆ ಬಯಸಿದ್ದಾಗಲೂ ಅಮೆರಿಕದ ಮುಸ್ಲಿಂ ಮತದಾರರು ಅವರ ವಿರುದ್ಧ ನಿಂತಿದ್ದರು. ಇದೀಗ ಇದೇ ಮತದಾರರು ಕಮಲಾ ಹ್ಯಾರಿಸ್ ಅವರ ವಿರುದ್ಧವಾಗಿಯೂ ಅಭಿಯಾನ ಆರಂಭಿಸಿದ್ದಾರೆ.

ಈ ಅಭಿಯಾನದ ಅಡಿ ಈಗಾಗಲೇ ಸುಮಾರು 1 ಮಿಲಿಯನ್ ಅಮೆರಿಕನ್ ಮುಸ್ಲಿಂ ಮತದಾರರನ್ನು ತನ್ನತ್ತ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದೇವೆ ಎಂದು ಸಂಘಟನಾಕಾರರು ಹೇಳಿಕೊಂಡಿದ್ದಾರೆ. ಕಮಲಾ ಹ್ಯಾರಿಸ್ ಮಾತ್ರವಲ್ಲ, ಅಮೆರಿಕದ ಮಿಚಿಗನ್ ನಗರದಲ್ಲಿ ಡೆಮಾಕ್ರೆಟಿಕ್ ಪಕ್ಷದ ಪ್ರತಿನಿಧಿಗಳ ಪರವಾಗಿಯೂ ಮತ ಚಲಾವಣೆ ಮಾಡದಂತೆ ಅಭಿಯಾನ ನಡೆಯುತ್ತಿದೆ.

ಇದಲ್ಲದೆ ಅಮೆರಿಕದ ವಿಸ್ಕಾನ್ಸಿನ್ ರಾಜ್ಯದಲ್ಲೂ ಮುಸ್ಲಿಂ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿ ಇದ್ದಾರೆ. ಈ ಮತದಾರರು ಕಮಲಾ ಹ್ಯಾರಿಸ್ ಅವರ ವಿರುದ್ಧ ನಿಲ್ಲುವಂತೆ ಮಾಡಲು ಅಭಿಯಾನ ಗಮನ ಕೇಂದ್ರೀಕರಿಸಿದೆ. ಈ ಕುರಿತಾಗಿ ಸಮೀಕ್ಷಾ ಸಂಸ್ಥೆಯೊಂದು ನಡೆಸಿದ ಸಮೀಕ್ಷೆಯಲ್ಲಿ ಕಮಲಾ ಹ್ಯಾರಿಸ್ ಅವರು ಮಿಚಿಗನ್ ಹಾಗೂ ವಿಸ್ಕಾನ್ಸಿನ್ ರಾಜ್ಯಗಳಲ್ಲಿ ಅಲ್ಪ ಮುನ್ನಡೆ ಸಾಧಿಸುವ ಸಾಧ್ಯತೆ ವ್ಯಕ್ತವಾಗಿದೆ.

ಅಮೆರಿಕದಲ್ಲಿ ನವೆಂಬರ್ ತಿಂಗಳ ಅಂತ್ಯಕ್ಕೆ ಅಧ್ಯಕ್ಷೀಯ ಚುನಾವಣೆ ಮತದಾನ ನಡೆಯಲಿದ್ದು, ಡೆಮಾಕ್ರೆಟಿಕ್ ಪಕ್ಷದ ಅಭ್ಯರ್ಥಿಯಾಗಿ ಕಮಲಾ ಹ್ಯಾರಿಸ್ ಅವರು ಸ್ಪರ್ಧೆ ಮಾಡಿದ್ದರೆ, ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿಯಾಗಿ ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಕಣದಲ್ಲಿದ್ದಾರೆ.

ಇಸ್ರೇಲ್ ದೇಶದ ಮೇಲೆ 2023ರ ಅಕ್ಟೋಬರ್‌ನಲ್ಲಿ ಹಮಾಸ್ ಉಗ್ರರು ದಾಳಿ ನಡೆಸಿದ ಬಳಿಕ ಇಸ್ರೇಲ್ ಸೇನೆ ಗಾಜಾ ಪಟ್ಟಿಯಲ್ಲಿ ಬಾಂಬ್‌ಗಳ ಮಳೆ ಸುರಿಸುತ್ತಿದೆ. ಗಾಜಾ ಪಟ್ಟಿಯಲ್ಲಿ ಜನ ಸಾಮಾನ್ಯರು, ಮಹಿಳೆಯರು, ಮಕ್ಕಳ ಹತ್ಯೆ ಆಗುತ್ತಿದೆ ಎಂದು ಆಕ್ರೋಶ ವ್ಯಕ್ತವಾಗುತ್ತಿದ್ದು, ಇದನ್ನ ತಡೆಯಬೇಕೆಂದು ವಿಶ್ವಾದ್ಯಂತ ಮುಸ್ಲಿಮರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಇದೇ ಆಕ್ರೋಶದ ಕೂಗು ಅಮೆರಿಕದಲ್ಲೂ ಕೇಳಿ ಬಂದಿದ್ದು, ಇಸ್ರೇಲ್‌ ನೆರವಿಗೆ ನಿಂತಿರುವ ಅಮೆರಿಕ ಸರ್ಕಾರದ ವಿರುದ್ಧ ಮುಸ್ಲಿಂ ಸಮುದಾಯದಲ್ಲಿ ಆಡಳಿತ ವಿರೋಧಿ ಅಲೆ ಎದ್ದಿದೆ.

ವೆಬ್ ಡೆಸ್ಕ್
ಫೋಕಸ್ ಕರ್ನಾಟಕ