ಬೆಂಗಳೂರಿನ ಪಿಜಿ ಒಳ ನುಗ್ಗಿ 20 ವರ್ಷದ ಮಹಿಳಾ ಟೆಕ್ಕಿಯನ್ನ ರೇಪ್‌ ಮಾಡಿದವನಿಗೆ 10 ವರ್ಷ ಜೈಲು!
ಬೆಂಗಳೂರಿನ ಪಿಜಿ ಒಳ ನುಗ್ಗಿ 20 ವರ್ಷದ ಮಹಿಳಾ ಟೆಕ್ಕಿಯನ್ನ ರೇಪ್‌ ಮಾಡಿದವನಿಗೆ 10 ವರ್ಷ ಜೈಲು!
ಮಹಿಳಾ ಪಿಜಿಗೆ ನುಗ್ಗಿ ಒಂಟಿ ಯುವತಿ ಮೇಲೆ ಅತ್ಯಾಚಾರವೆಸಗಿದ್ದ ಅಪರಾಧಿಗೆ 10 ವರ್ಷ ಜೈಲು, ಒಂದು ಲಕ್ಷ ರೂ. ದಂಡ ವಿಧಿಸಿ ನಗರದ 54 ನೇ ಹೆಚ್ಚುವರಿ ಸೆಷನ್ಸ್‌ ನ್ಯಾಯಾಲಯ ಆದೇಶ ಹೊರಡಿಸಿದೆ.
ಕೋಲಾರ ಮೂಲದ ಮುರುಳಿ (28) ಶಿಕ್ಷೆಗೆ ಗುರಿಯಾದವನು. ಪ್ರತಿಷ್ಠಿತ ಸಾಫ್ಟ್‌ವೇರ್‌ ಕಂಪನಿ ಉದ್ಯೋಗಿ 20 ವರ್ಷದ ಯುವತಿ ಎಲೆಕ್ಟ್ರಾನಿಕ್‌ ಸಿಟಿ 2ನೇ ಹಂತದ ಮಹಿಳಾ ಪಿಜಿಯೊಂದರಲ್ಲಿ ವಾಸವಿದ್ದರು. 2016ರ ಆಗಸ್ಟ್ 25 ರಂದು ಬೆಳಗಿನ ಜಾವ ಯುವತಿ ಕೊಠಡಿಗೆ ನುಗ್ಗಿದ್ದ ಮುರುಳಿ ಚಾಕು ತೋರಿಸಿ ಬೆದರಿಸಿದ್ದ. ಬಳಿಕ ಬೆಡ್‌ರೂಂಗೆ ಎಳೆದೊಯ್ದು ಅತ್ಯಾಚಾರ ಎಸಗಿದ್ದ.
ಕೃತ್ಯದ ಕುರಿತು ಸಂತ್ರಸ್ತೆ ನೀಡಿದ ದೂರು ಆಧರಿಸಿ ಪ್ರಕರಣ ದಾಖಲಿಸಿಕೊಂಡಿದ್ದ ಪರಪ್ಪನ ಅಗ್ರಹಾರ ಠಾಣೆ ಪೊಲೀಸರು ಆರೋಪಿ ಮುರುಳಿಯನ್ನು ಬಂಧಿಸಿ ಜೈಲಿಗೆ ಕಳಿಸಿದ್ದರು. ಪ್ರಕರಣದ ತನಿಖೆ ಪೂರ್ಣಗೊಳಿಸಿ ಆರೋಪಿ ವಿರುದ್ಧ ಅತ್ಯಾಚಾರ ಆರೋಪದನ್ವಯ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು.
ಪ್ರಕರಣದ ವಿಚಾರಣೆ ಪೂರ್ಣಗೊಳಿಸಿದ ನ್ಯಾಯಾಧೀಶೆ ಡಿ.ಅನಿತಾ, ಪ್ರಾಸಿಕ್ಯೂಷನ್‌ ಸಲ್ಲಿಸಿದ್ದ ಸಾಕ್ಷ್ಯಾಧಾರ ಹಾಗೂ ವಾದ ಪರಿಗಣಿಸಿ ಅಪರಾಧಿ ಮುರುಳಿಗೆ 10 ವರ್ಷ ಜೈಲು, ಒಂದು ಲಕ್ಷ ರೂ. ದಂಡ ವಿಧಿಸಿ ಆದೇಶ ಹೊರಡಿಸಿದ್ದಾರೆ. ಪ್ರಾಸಿಕ್ಯೂಷನ್‌ ಪರವಾಗಿ ಸರ್ಕಾರಿ ಅಭಿಯೋಜಕಿ ಸವಿತಾ ಡಿ. ರತನ್‌ ವಾದಿಸಿದ್ದರು.
ರೋಪಿ ಮುರುಳಿ ಕೃತ್ಯ ಎಸಗಿರುವುದಕ್ಕೆ ವೈದ್ಯಕೀಯ ವರದಿ ಹಾಗೂ ಎಫ್‌ಎಸ್‌ಎಲ್‌ ವರದಿಗಳ ಸಾಕ್ಷ್ಯವಿತ್ತು. ಜತೆಗೆ, ಸಂತ್ರಸ್ತೆಯೂ ಆರೋಪಿಯ ಗುರುತು ಪತ್ತೆಹಚ್ಚಿದ್ದರು. ಪ್ರಕರಣದ ಸಾಕ್ಷಿಗಳಾಗಿದ್ದವರು ವಿಚಾರಣೆಗೆ ಹಾಜರಾಗಿ ಸಾಕ್ಷ್ಯ ನುಡಿದಿದ್ದರು. ಈ ಎಲ್ಲಅಂಶಗಳು ಆರೋಪಿಯೇ ಕೃತ್ಯ ಎಸಗಿದ್ದಾನೆ ಎಂಬುದನ್ನು ರುಜುವಾತು ಮಾಡಲು ಸಾಧ್ಯವಾಯಿತು ಎಂದು ಸರಕಾರಿ ಅಭಿಯೋಜಕಿ ಸವಿತಾ ಡಿ. ರತನ್‌ ತಿಳಿಸಿದರು.
ತಮಿಳುನಾಡು ಮೂಲದ ಸಂತ್ರಸ್ತೆ ಸ್ನೇಹಿತೆ ಜತೆ ಮಹಿಳಾ ಪಿಜಿಯ ಕೊಠಡಿಯೊಂದಲ್ಲಿವಾಸವಿದ್ದರು. ಆಗಸ್ಟ್ 24ರಂದು ರಾತ್ರಿ ಪಾಳಿ ಕೆಲಸ ಮುಗಿಸಿಕೊಂಡು ಬೆಳಗಿನ ಜಾವ ಎರಡು ಗಂಟೆ ಸುಮಾರಿಗೆ ಕೊಠಡಿಗೆ ಬಂದು ಒಬ್ಬರೇ ನಿದ್ರೆಗೆ ಜಾರಿದ್ದರು. ತಲೆನೋವಿನ ಕಾರಣಕ್ಕೆ ಮಾತ್ರೆ ನುಂಗಿ ನಿದ್ರೆಗೆ ಜಾರಿದ್ದ ಯುವತಿ, ಕೊಠಡಿ ಬಾಗಿಲು ಮುಚ್ಚುವುದನ್ನು ಮರೆತಿದ್ದರು. ಸುಮಾರು ಅರ್ಧ ಗಂಟೆ ಬಳಿಕ ಕೊಠಡಿಗೆ ಕಳ್ಳತನಕ್ಕೆ ಬಂದಿದ್ದ ಮುರುಳಿ, ಯುವತಿ ಕತ್ತಿಗೆ ಚಾಕುವಿಟ್ಟು ಆಭರಣ ಹಾಗೂ ಹಣ ಕೊಡುವಂತೆ ಬೆದರಿಸಿದ್ದ. ಬಳಿಕ ಆಕೆಯನ್ನು ಬೆಡ್‌ ರೂಂಗೆ ಎಳೆದೊಯ್ದು ಅತ್ಯಾಚಾರವೆಸಗಿ ಪರಾರಿಯಾಗಿದ್ದ ಎಂದು ಪೊಲೀಸರು ತಿಳಿಸಿದರು.
ಸೂಕ್ತ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳದೆ ಕೃತ್ಯ ಜರುಗಲು ಕಾರಣವಾದ ಪಿಜಿ ಮಾಲೀಕನನ್ನು ಪ್ರಕರಣದ 2ನೇ ಆರೋಪಿಯನ್ನಾಗಿ ಪರಿಗಣಿಸಿ ದೋಷಾರೋಪ ಪಟ್ಟಿ ಸಲ್ಲಿಸಲಾಗಿತ್ತು. ಆರೋಪಿ ನ್ಯಾಯಾಲಯದ ಮುಂದೆ ತಪ್ಪೊಪ್ಪಿಕೊಂಡು ದಂಡ ಪಾವತಿಸಿದ್ದ ಎಂದು ಪೊಲೀಸರು ಹೇಳಿದರು.
ವೆಬ್ ಡೆಸ್ಕ್
ಫೋಕಸ್ ಕರ್ನಾಟಕ
ನಿಮ್ಮ ಪ್ರತಿಕ್ರಿಯೆ ಏನು?
