Zaheer Khan: ತಂದೆಯಾದ ಖುಷಿಯಲ್ಲಿ ಟೀಮ್ ಇಂಡಿಯಾದ ಮಾಜಿ ವೇಗಿ..! 8 ವರ್ಷಗಳ ಬಳಿಕ ಪುಟ್ಟ ಮಗುವಿನ ಆಗಮನ

ಬಾಲಿವುಡ್ ನಟಿ ಸಾಗರಿಕಾ ಘಾಟ್ಗೆ ಮತ್ತು ಭಾರತದ ಮಾಜಿ ಕ್ರಿಕೆಟಿಗ ಜಹೀರ್ ಖಾನ್ ಪೋಷಕರಾಗಿದ್ದಾರೆ. ಹೌದು ಮನೆಗೆ ಒಬ್ಬ ಪುಟ್ಟ ಅತಿಥಿ ಬಂದಿದ್ದಾನೆ. 8 ವರ್ಷಗಳ ಬಳಿಕ ಸ್ಟಾರ್ ದಂಪತಿ ಮನೆಗೆ ಪುಟ್ಟ ಮಗುವಿನ ಆಗಮನವಾಗಿರುವುದು ಮನೆಯಲ್ಲಿ ಸಂಭ್ರಮ ಹೆಚ್ಚು ಮಾಡಿದೆ. ಝಹೀರ್ ಖಾನ್ ಹಾಗೂ ಸಾಗರಿಕಾ ಘಾಟ್ಗೆ 2017 ರಲ್ಲಿ ವಿವಾಹವಾಗಿದ್ದರು. ಇದೀಗ ಈ ದಂಪತಿಯ ಪ್ರೀತಿಯ ಸಂಕೇತವಾಗಿ ಪುಟ್ಟ ಪುಟಾಣಿಯ ಆಗಮನವಾಗಿದೆ.

ಝಹೀರ್ ಖಾನ್ ತಂದೆಯಾಗಿರುವ ಖುಷಿ ಸುದ್ದಿಯನ್ನು ಏಪ್ರಿಲ್ 16 ರ ಬೆಳಿಗ್ಗೆ ಅವರ ಪತ್ನಿ ಸಾಗರಿಕಾ ಘಾಟ್ಗೆ ಇನ್‌ಸ್ಟಾಗ್ರಾಮ್ ಪೋಸ್ಟ್‌ ಮೂಲಕ ಬಹಿರಂಗಪಡಿಸಿದ್ದರು. ಅಲ್ಲದೆ ತಮ್ಮ ಮನೆಯ ಹೊಸ ಸದಸ್ಯನಿಗೆ ಫತೇಹ್ ಸಿನ್ಹ್​ ಖಾನ್ ಎಂದು ಹೆಸರಿಟ್ಟಿರುವುದಾಗಿ ತಿಳಿಸಿದ್ದಾರೆ.

ಫತೇಹ್ ಎಂದರೆ ವಿಜಯಶಾಲಿ ಎಂಬ ಅರ್ಥವಿದೆ. ಹಾಗೆಯೇ ಸಾಗರಿಕಾ ಘಾಟ್ಗೆ ರಜಪೂತ ವಂಶಸ್ಥರಾಗಿದ್ದು, ಹೀಗಾಗಿ ಮಗುವಿನ ಹೆಸರಿನ ಹಿಂದೆ ಸಿನ್ಹ್​ ಸೇರಿಸಲಾಗಿದೆ. ಹಾಗೆಯೇ ಝಹೀರ್ ಖಾನ್ ಅವರ ಸರ್​ನೇಮ್ ಖಾನ್ ಅನ್ನು ಸಹ ಮಗುವಿನ ಹೆಸರಿನೊಂದಿಗೆ ಮುಂದುವರೆಸಲಾಗಿದೆ.

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್-18 ರಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಮೆಂಟರ್ ಆಗಿ ಝಹೀರ್ ಖಾನ್ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಈ ಹುದ್ದೆಯೊಂದಿಗೆ ಬೌಲಿಂಗ್ ಕೋಚ್ ಆಗಿಯೂ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಮೂಲಕ ಐಪಿಎಲ್​ನಲ್ಲಿ ಬ್ಯುಸಿಯಾಗಿದ್ದ ಝಹೀರ್ ಖಾನ್, ಸಣ್ಣ ಬ್ರೇಕ್​ನೊಂದಿಗೆ ಕೆಲ ದಿನಗಳ ಕಾಲ ಪತ್ನಿ ಹಾಗೂ ಮಗುವಿನೊಂದಿಗೆ ಕಾಲ ಕಳೆಯಲಿದ್ದಾರೆ ಎಂದು ವರದಿಯಾಗಿದೆ.