ಗುರುವಾರ ರಾಯರನ್ನು ಪೂಜಿಸುವುದು ಹೇಗೆ? ಅಪ್ಪಿತಪ್ಪಿಯೂ ಈ ತಪ್ಪುಗಳು ಆಗಬಾರದು!

ಗುರುವಾರವು ರಾಯರ ದಿನ. ಈ ದಿನ ರಾಘವೇಂದ್ರ ಸ್ವಾಮಿಯವರನ್ನು ನಿಯಮಾನುಸಾರ ಪೂಜಿಸುವ ಸಂಪ್ರದಾಯವಿದೆ. ಗುರುವಾರ ಆಗಿರಬಹುದು ಅಥವಾ ಇನ್ನಾವುದೇ ದಿನದಂದು ಆಗಿರಬಹುದು ರಾಘವೇಂದ್ರ ಸ್ವಾಮಿಯನ್ನು ಪೂಜಿಸುವುದರ ಪ್ರಯೋಜನವೇನು ಗೊತ್ತೇ.? ಈ ಕಾರಣಕ್ಕಾಗಿ ನೀವು ರಾಘವೇಂದ್ರ ಸ್ವಾಮಿಯವರನ್ನು ಪೂಜಿಸಲೇಬೇಕು.

ಹೌದು, ಗುರುವಾರದಂದು ಕೇವಲ ಭಗವಾನ್‌ ವಿಷ್ಣುವನ್ನು ಮಾತ್ರವಲ್ಲ, ಶ್ರೀ ಗುರುರಾಘವೇಂದ್ರನನ್ನು ಕೂಡ ಹೆಚ್ಚಿನವರು ಪೂಜಿಸುತ್ತಾರೆ. ಗುರುರಾಘವೇಂದ್ರನನ್ನು 6 ಗುರುವಾರಗಳವರಗೆ ಪೂಜಿಸಲಾಗುತ್ತದೆ. 7 ನೇ ಗುರುವಾರದಂದು ಗುರು ರಾಯರಿಗೆ ಅಂತಿಮ ಪೂಜೆಯನ್ನು ಮಾಡಿ ವಿಶೇಷ ಅರ್ಪಣೆಯನ್ನು ಮಾಡಲಾಗುತ್ತದೆ. ಗುರುವಾರದಂದು ರಾಘವೇಂದ್ರನನ್ನು ಪೂಜಿಸುವುದರಿಂದ ಕುಟುಂಬದಲ್ಲಿ ಶಾಂತಿ, ಸಂತೋಷ ಮತ್ತು ಆರೋಗ್ಯ ಪ್ರಾಪ್ತವಾಗುತ್ತದೆ.

ಗುರುವಾರ ರಾಘವೇಂದ್ರ ಸ್ವಾಮಿ ಪೂಜಾ ವಿಧಾನ:
1) ಗುರುವಾರದಂದು ಪೂಜಾ ಸ್ಥಳವನ್ನು ಸ್ವಚ್ಛಗೊಳಿಸಿ, ಪೂಜೆಯ ಸ್ಥಳದಲ್ಲಿ ರಂಗೋಲಿಯನ್ನು ಹಾಕಿ.

2) ರಂಗೋಲಿಯ ಮೇಲೆ ಮಣೆಯನ್ನು ಅಥವಾ ಪೂಜಾ ಟೇಬಲ್‌ನಿಟ್ಟು ಅದರ ಮೇಲೆ ರಾಘವೇಂದ್ರ ಸ್ವಾಮಿಯ ಫೋಟೋ ಅಥವಾ ವಿಗ್ರಹವನ್ನಿಡಬೇಕು.

3) ರಾಘವೇಂದ್ರ ಸ್ವಾಮಿಯ ವಿಗ್ರಹವನ್ನು ಸ್ವಚ್ಛಗೊಳಿಸಿದ ಬಳಿಕ ಶ್ರೀಗಂಧ ಮತ್ತು ಕುಂಕುಮವನ್ನು ವಿಗ್ರಹಕ್ಕೆ ಅನ್ವಯಿಸಿ

4) ನಂತರ ರಾಘವೇಂದ್ರ ಫೋಟೋಗೆ ತುಳಸಿ ಹಾರವನ್ನು ಮತ್ತು ಹೂವಿನ ಹಾರವನ್ನು ಹಾಕಬೇಕು. ರಾಘವೇಂದ್ರನ ಪೂಜೆಯಲ್ಲಿ ತಪ್ಪದೇ ತುಳಸಿಯನ್ನು ಅಥವಾ ತುಳಸಿ ಹಾರವನ್ನು ತಪ್ಪದೇ ಉಪಯೋಗಿಸಬೇಕು.

5) ತಾಜಾ ಹಣ್ಣುಗಳನ್ನು, ತೆಂಗಿನಕಾಯಿಯನ್ನು, ವೀಳ್ಯದೆಲೆಯನ್ನು ಅರ್ಪಿಸಬೇಕು. ರಾಘವೇಂದ್ರನನ್ನು ಪೂಜಿಸುವ ಮುನ್ನ ಮೊದಲೊಂದಿಪನಾದ ವಿಘ್ನೇಶನನ್ನು ಪೂಜಿಸಬೇಕು.

6) ರಾಘವೇಂದ್ರನಿಗೆ ಧೂಪ - ದೀಪವನ್ನು ಬೆಳಗಿ ನೈವೇದ್ಯವನ್ನು ಅರ್ಪಿಸಿ ನಂತರ 11 ಪ್ರದಕ್ಷಿಣೆಯನ್ನು ಹಾಕಬೇಕು. ರಾಘವೇಂದ್ರ ಸ್ವಾಮಿಗೆ 11 ಪ್ರದಕ್ಷಿಣೆಯನ್ನು ಹಾಕುವಾಗ ಈ ಮಂತ್ರವನ್ನು ತಪ್ಪದೇ ಪಠಿಸಿ

ಪೂಜ್ಯಾಯಾ ಶ್ರೀ ರಾಘವೇಂದ್ರಾಯ
ಸತ್ಯಧರ್ಮ ರಥಾಯಚ
ಭಜತಾಂ ಕಲ್ಪವೃಕ್ಷಯಾ
ನಮತಾಂ ಶ್ರೀ ಕಾಮಧೇನುವೇ''

ಗುರುವಾರ ರಾಘವೇಂದ್ರ ಸ್ವಾಮಿಯನ್ನು ಪೂಜಿಸುವಾಗ ಈ ವಿಷಯಗಳನ್ನು ಗಮನದಲ್ಲಿಟ್ಟುಕೊಳ್ಳಿ:
1) ಶ್ರೀ ರಾಘವೇಂದ್ರನನ್ನು ಪೂಜಿಸಲು ಗುರವಾರ ಅತ್ಯುತ್ತಮ ದಿನವಾಗಿದೆ. ಆದರೆ ಯಾವುದೇ ಶುಭ ದಿನದಂದು ನೀವು ರಾಯರ ಆರಾಧನೆಯನ್ನು ಆರಂಭಿಸಬಹುದು. ಇದಕ್ಕೆ ಗುರುವಾರವೇ ಬೇಕೆಂದು ಕಾಯಬೇಕಾಗಿಲ್ಲ.

2) ಪುರುಷರು ಬಿಳಿ ಬಣ್ಣದ ಧೋತಿಯನ್ನು ಧರಿಸಿ ಖಾಲಿ ಮೈಯಲ್ಲಿ ಇರಬೇಕು. ಮತ್ತು ಮಹಿಳೆಯರು ಸೀರೆಯನ್ನು ಉಡಬೇಕು.

3) ನೀವು ಗುರುವಾರ ಬೆಳಗ್ಗೆ ಪೂಜೆಯನ್ನು ಮಾಡುವುದಾದರೆ ಬುಧವಾರ ದಿನ ರಾತ್ರಿಯೇ ಪೂಜೆಗೆ ಉಡುವ ಬಟ್ಟೆಯನ್ನು ನೀರಿನಲ್ಲಿ ನೆನಸಿಟ್ಟು, ಪೂಜೆಗೆ ಸಂಬಂಧಿಸಿದ ಬಟ್ಟೆಗಳನ್ನು ಒಣಗಿಸುವ ಜಾಗದಲ್ಲೇ ಈ ಬಟ್ಟೆಯನ್ನು ಒಣಗಿಸಿ.

4) ಪೂಜೆಯ ದಿನ ಮಲಗಲು ಹಾಸಿಗೆ ಅಥವಾ ದಿಂಬನ್ನು ಬಳಸಬೇಡಿ. ಮಲಗುವ ನೆಲದಲ್ಲಿ ಶುದ್ಧ ಬಟ್ಟೆ ಅಥವಾ ಚಾಪೆಯನ್ನು ಹಾಕಿ.

5) ಮುಂಜಾನೆ ಬೆಳಗ್ಗೆ 5 ಗಂಟೆಗೆ ಎದ್ದು ಪೂಜೆಯನ್ನು ಆರಂಭಿಸಿ.

6) ಮನಸ್ಸನ್ನು ನಿಮ್ಮ ನಿಯಂತ್ರದಲ್ಲಿಟ್ಟುಕೊಳ್ಳಲು ಮರೆಯದಿರಿ. ಈ ದಿನ ನೀವು ಉಪವಾಸ ಆಚರಿಸುವುದು ಉತ್ತಮ. ಸಂಪೂರ್ಣ ಉಪವಾಸ ಮಾಡಲು ಸಾಧ್ಯವಾಗದಿದ್ದರೆ ಹಣ್ಣು ಮತ್ತು ಹಾಲನ್ನು ಸೇವಿಸಬಹುದು.

ಗುರುವಾರದಂದು ಶ್ರೀ ರಾಘವೇಂದ್ರ ಸ್ವಾಮಿಯನ್ನು ಪೂಜಿಸುವುದರಿಂದ ಸಂತೋಷ, ಆರೋಗ್ಯ ಮತ್ತು ಸಮೃದ್ಧಿಯು ಪ್ರಾಪ್ತವಾಗುತ್ತದೆ. ಗುರುವಾರವು ಭಗವಾನ್‌ ವಿಷ್ಣುವಿಗೆ ಅರ್ಪಿತವಾದ ದಿನವಾದರೂ ಇಂದು ಹಲವೆಡೆ ಭಗವಾನ್‌ ವಿಷ್ಣುವನ್ನು ಮತ್ತು ಇನ್ನು ಹಲವೆಡೆ ಗುರು ರಾಯರನ್ನು ಪೂಜಿಸುತ್ತಾರೆ.