ಡೊನಾಲ್ಡ್ ಟ್ರಂಪ್ ಗೆ ಸಾವಿರಾರು ಕೋಟಿ ನಷ್ಟ!
ಡೊನಾಲ್ಡ್ ಟ್ರಂಪ್ ಗೆ ಸಾವಿರಾರು ಕೋಟಿ ನಷ್ಟ!
ಅಮೆರಿಕದ ಅಧ್ಯಕ್ಷಗಿರಿಗೆ ಸ್ಪರ್ಧಿಸಿರುವ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಸಂಬಂಧಿಸಿದ ಸೋಷಿಯಲ್ ಮೀಡಿಯಾ ಕಂಪನಿಗಳ ಷೇರುಗಳು ದಿಢೀರನೆ ಇಳಿಕೆಯಾಗಿವೆ. ಡಿಜಿಟಲ್ ಮಾರುಕಟ್ಟೆಯಲ್ಲಿ ವರ್ಚ್ಯುವಲ್ ಮಾದರಿಯ ಹೂಡಿಕೆಗಳನ್ನು ನಿರ್ವಹಿಸುವುದು ಅಥವಾ ಡಿಜಿಟಲ್ ಮಾದರಿಯಲ್ಲಿ ಮಾಹಿತಿ ಸೇವೆಯನ್ನು ನೀಡುವ ಕಂಪನಿಗಳನ್ನು ಸೋಷಿಯಲ್ ಮೀಡಿಯಾ ಕಂಪನಿಗಳೆಂದು ಕರೆಯುತ್ತಾರೆ. ಆ ಕಂಪನಿಗಳ ಷೇರು ವಹಿವಾಟನ್ನು ಸೋಷಿಯಲ್ ಮೀಡಿಯಾ ಸ್ಟಾಕ್ ಎಂದು ಕರೆಯಲಾಗುತ್ತದೆ. ಟ್ರಂಪ್ ಅವರ ಸೋಷಿಯಲ್ ಮೀಡಿಯಾ ಕಂಪನಿಗಳ ಷೇರಿನ ಮೌಲ್ಯ ಸೆ. 12ರಂದು ಸರಾಸರಿಯಾಗಿ ಶೇ. 17ರಷ್ಟು ಕುಸಿದಿದೆ ಎಂದು ಹೇಳಲಾಗಿದೆ.
ಅಷ್ಟಕ್ಕೂ ಹೀಗಾಗಿದ್ದು ಯಾಕೆ ಎಂದು ಎಲ್ಲರಿಗೂ ಅಚ್ಚರಿಯಾಗಬಹುದು. ಅದಕ್ಕೆ ಕಾರಣ, ಡೊನಾಲ್ಡ್ ಟ್ರಂಪ್ ಅವರು ಭಾಗವಹಿಸಿದ್ದ ಚರ್ಚಾಕೂಟ! ಅಮೆರಿಕದಲ್ಲೀಗ ಅಧ್ಯಕ್ಷೀಯ ಚುನಾವಣಾ ಕಾವು ಏರಿರುವುದು ಎಲ್ಲರಿಗೊ ಗೊತ್ತಿದೆ. ಟ್ರಂಪ್ ಹಾಗೂ ಅಮೆರಿಕದ ಹಾಲಿ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ ಅವರು ಚುನಾವಣೆಯ ಕಣದಲ್ಲಿದ್ದಾರೆ. ಅಮೆರಿಕದ ಖಾಸಗಿ ವಾಹಿನಿಯೊಂದು ಈ ಇಬ್ಬರೂ ನಾಯಕರನ್ನು ಒಂದೇ ವೇದಿಕೆಗೆ ಕರೆತಂದು ಅಲ್ಲಿ ಒಂದು ಚರ್ಚಾಕೂಟವನ್ನು ಆಯೋಜಿಸಿತ್ತು.
ಭಾರತೀಯ ಕಾಲಮಾನದ ಪ್ರಕಾರ ಬುಧವಾರ ಬೆಳಗಿನ ಜಾವ 6.30 ಸುಮಾರಿಗೆ ಆರಂಭವಾಗಿ ಸುಮಾರು ಒಂದೂವರೆ ಗಂಟೆಗಳ ಕಾಲ ನಡೆದ ಈ ಚರ್ಚಾಕೂಟದಲ್ಲಿ ಅಮೆರಿಕ ಸರ್ಕಾರದ ಆಡಳಿತ, ಅಲ್ಲಿನ ಸಮಸ್ಯೆಗಳು, ಹಣಕಾಸು ವ್ಯವಸ್ಥೆ, ವಲಸಿಗರಿಗೆ ಉದ್ಯೋಗ ಇತ್ಯಾದಿ ಹಲವಾರು ವಿಚಾರಗಳ ಬಗ್ಗೆ ಚರ್ಚಿಸಲಾಯಿತು. ಆದರೆ, ಅಂತಿಮವಾಗಿ ಆ ಚರ್ಚೆಯಲ್ಲಿ ಮೇಲುಗೈ ಸಾಧಿಸಿದ್ದು ಕಮಲಾ ಹ್ಯಾರಿಸ್.
ಟ್ರಂಪ್ ಅವರ ಸರ್ಕಾರದ ವೈಫಲ್ಯಗಳು, ಟ್ರಂಪ್ ಅವರ ಬಗ್ಗೆ ಜಗತ್ತಿನಲ್ಲಿರುವ ಹರಡಿರುವ ಹಗುರವಾದ ಇಮೇಜ್ ಇತ್ಯಾದಿಗಳನ್ನು ಹ್ಯಾರಿಸ್ ಎಳೆಎಳೆಯಾಗಿ ತೆರೆದಿಟ್ಟರು. ಅವರ ವಾದವನ್ನು ತಳ್ಳಿಹಾಕಲು ಹಾಗೂ ಹಾಲಿ ಅಧ್ಯಕ್ಷ ಜೊಬೈಡನ್ ಸರ್ಕಾರದ ವೈಫಲ್ಯಗಳನ್ನು ಎತ್ತಿ ತೋರಿಸಲು ಟ್ರಂಪ್ ಪ್ರಯತ್ನಿಸಿದರಾದರೂ ಅದು ಫಲ ನೀಡಲಿಲ್ಲ. ಅಂತಿಮವಾಗಿ, ಕಮಲಾ ಹ್ಯಾರಿಸ್ ಅವರೇ ಚರ್ಚೆಯಲ್ಲಿ ಹೆಚ್ಚು ಅಂಕಿ-ಅಂಶಗಳನ್ನು, ಹೆಚ್ಚು ವಾಸ್ತವವನ್ನು ತೆರೆದಿಡುವಲ್ಲಿ ಯಶಸ್ವಿಯಾದರು ಎಂದು ಅಮೆರಿಕದ ಜನತೆ ಹೇಳುತ್ತಿದೆ.
ವೆಬ್ ಡೆಸ್ಕ್
ಫೋಕಸ್ ಕರ್ನಾಟಕ
ನಿಮ್ಮ ಪ್ರತಿಕ್ರಿಯೆ ಏನು?
