ದೇಶವೇ ಆಚರಿಸಿದ ಹೋಳಿಯನ್ನು ಸೂಪರ್ ಸ್ಟಾರ್ ರಜನಿ ಆಚರಿಸಲ್ಲ- ಯಾಕೆ ಗೊತ್ತಾ!?

ಬಣ್ಣಗಳ ಹಬ್ಬ ಎಂದೂ ಕರೆಯಲ್ಪಡುವ ಹೋಳಿ ಹಬ್ಬವನ್ನು ಪ್ರತಿವರ್ಷದಂತೆ ಈ ವರ್ಷವೂ ಅದ್ದೂರಿಯಾಗಿ ಆಚರಣೆ ಮಾಡಲಾಗಿದೆ. ಬಣ್ಣಗಳ ಹಬ್ಬವು ವಸಂತಕಾಲದ ಆರಂಭವನ್ನು ಸೂಚಿಸುತ್ತದೆ ಮತ್ತು ಕೆಟ್ಟದ್ದರ ಮೇಲೆ ಒಳ್ಳೆಯದರ ವಿಜಯವನ್ನು ಸೂಚಿಸುತ್ತದೆ. ಹೋಳಿ ಹಬ್ಬವು ಪ್ರಹ್ಲಾದ ಮತ್ತಯ ಹೋಳಿಕಾಳ ಕಥೆಯೊಂದಿಗೆ ಸಂಬಂಧವನ್ನು ಹೊಂದಿದೆ. ಯುವಕ, ಯುವತಿಯರು, ಮಕ್ಕಳು ಈ ಹಬ್ಬವನ್ನು ಸಂಭ್ರಮಿಸುತ್ತಾರೆ. 

ಪ್ರತಿ ಹೋಳಿ ಹಬ್ಬದ ದಿನ ರಜನಿಕಾಂತ್​ ಥೇಟ್​ ದಳಪತಿ ಸಿನಿಮಾ ಸೀನ್​ ತರಹವೇ ಫುಲ್ ಸೈಲೆಂಟ್​ ಆಗ್ತಾರೆ. 

ಕಳೆದ 50 ವರ್ಷಗಳಿಂದಲೂ ಹೋಳಿ ಹಬ್ಬದ ದಿನ ರಜನಿಕಾಂತ್​ ಒಂದು ವ್ರತದಂತೆಯೇ ಆ ಒಬ್ಬ ವ್ಯಕ್ತಿಯನ್ನು ಭೇಟಿ ಮಾಡಿ ಆಶೀರ್ವಾದ ಪಡೆಯುತ್ತಿದ್ದರು. ಆದರೆ, ಕಳೆದ 11 ವರ್ಷಗಳಿಂದ ರಜನಿ ಬದುಕಿನ ಚೀಫ್ ಗೆಸ್ಟ್​​ ಭೇಟಿ ಸಿಗ್ತಿಲ್ಲ. ಅಷ್ಟಕ್ಕೂ ಏನಿದು ರಜನಿಕಾಂತ್​ ಬದುಕಿನ ಹೋಳಿ ಸೀಕ್ರೆಟ್​ ಅಂತೀರಾ? ಇಲ್ಲಿದೆ ಮಾಹಿತಿ.

ರಜನಿಕಾಂತ್​​ಗೆ ಇದೀಗ 74 ವರ್ಷ ವಯಸ್ಸು. ಆದ್ರೆ, ಅದು ಶಿವಾಜಿ ರಾವ್ ಗಾಯಕ್ವಾಡ್​​ ಹೆಸರು ಅನ್ನೋ ಬಿಎಂಟಿಸಿ ಕಂಡಕ್ಟರ್​ ವಯಸ್ಸು. ರಜನಿಕಾಂತ್​​ ಅನ್ನೋ ಸೂಪರ್​ಸ್ಟಾರ್​ಗೀಗ 50 ವರ್ಷ. ಕಲಾವಿದ ಆಗಬೇಕು ಅಂತ ಕಂಡಕ್ಟರ್​ ವೃತ್ತಿಗೆ ರಾಜೀನಾಮೆ ಕೊಟ್ಟು ಮದ್ರಾಸ್​​ನಲ್ಲಿ ಅಲೆದಾಡಿ ಅಪಮಾನ ಕಂಡಿದ್ದ ಶಿವಾಜಿರಾವ್​ ಬದುಕನ್ನೇ ಬದಲಿಸಿದ್ದು ಖ್ಯಾತ ನಿರ್ದೇಶಕ ದಿವಂಗತ ಕೆ. ಬಾಲಚಂದರ್. ಇದೇ ಕೆ. ಬಾಲಚಂದರ್​ ಶಿವಾಜಿ ರಾವ್ ಗಾಯಕ್ವಾಡ್​​ ಹೆಸರನ್ನು 1975 ಮಾರ್ಚ್​​ 27ರ ಹೋಳಿ ಹಬ್ಬದ ದಿನವೇ ಬದಲಿಸಿದ್ರು. ಭರ್ತಿ 50 ವರ್ಷಗಳ ಹಿಂದೆ ಬಾಲಚಂದರ್​ ರಜನಿಕಾಂತ್​ ಅಂತ ಮರು ನಾಮಕರಣ ಮಾಡಿದ್ರು. ಇದೇ ಕಾರಣಕ್ಕೆ ರಜನಿಕಾಂತ್​​ ಹೋಳಿ ಹಬ್ಬವನ್ನು ಒಂದು ವ್ರತದಂತೆ ಆಚರಿಸುತ್ತಿದ್ರು.

ಶಿವಾಜಿರಾವ್ ಗಾಯಕ್ವಾಡ್​ ರಜನಿಕಾಂತ್​ ಆದಾಗಿನಿಂದ 2014ರವರೆಗೂ ಪ್ರತಿ ಹೋಳಿ ಹಬ್ಬದ ದಿನ ಗುರುವನ್ನು ಭೇಟಿ ಮಾಡಿ ಆಶೀರ್ವಾದ ಪಡೆದು ಬರ್ತಿದ್ರು. ಆದ್ರೆ 2014ರಲ್ಲಿ ಕೆ. ಬಾಲಚಂದರ್​ ಸಾವನ್ನಪ್ಪಿದ್ರು. ಅವತ್ತಿನಿಂದ ರಜನಿ ಮನೆಯಲ್ಲೇ ಗುರುವನ್ನು ನಮಿಸುವ ಹಾಗೂ ಹೋಳಿ ಹಬ್ಬದ ದಿನ ಯಾವುದೇ ಬಣ್ಣ ಹಚ್ಚದೇ ಒಂದು ಪವಿತ್ರ ಹಬ್ಬದಂತೆ ಗುರುವನ್ನು ನೆನೆಯುತ್ತಿದ್ದಾರೆ.