ವಾಟ್ಸಾಪ್ ಬಳಕೆದಾರರಿಗೆ ಬಿಗ್ ಶಾಕ್: 59 ಸಾವಿರ ಖಾತೆಗಳು ಬ್ಲಾಕ್! ನಿಮ್ಮದು ಆಗಿದ್ಯಾ ಚೆಕ್ ಮಾಡಿ!
ವಾಟ್ಸಾಪ್ ಬಳಕೆದಾರರಿಗೆ ಬಿಗ್ ಶಾಕ್ ಕೊಟ್ಟಿರುವ ಕೇಂದ್ರ ಗೃಹ ಇಲಾಖೆಯು, ಬರೋಬ್ಬರಿ 59 ಸಾವಿರ ಖಾತೆಗಳನ್ನು ಬ್ಲಾಕ್ ಮಾಡಿದೆ.
ಡಿಜಿಟಲ್ ವಂಚನೆಗೆ ಮರ್ಮಾಘಾತ ಕೊಡುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ. ಸೈಬರ್ ವಂಚನೆ ಹಾಗೂ ಡಿಜಿಟಲ್ ಅರೆಸ್ಟ್ಗಳ ಪ್ರಕರಣಗಳ ವಿಚಾರದಲ್ಲಿ ಕ್ರಮ ಕೈಗೊಳ್ಳಲು ಮುಂದಾಗಿದ್ದ ಕೇಂದ್ರ ಗೃಹ ಇಲಾಖೆ ಒಟ್ಟು 59 ಸಾವಿರ ವಾಟ್ಸಾಪ್ ಹಾಗೂ 1700 ಸ್ಕೈಪ್ ಐಡಿಗಳನ್ನು ಪತ್ತೆ ಮಾಡಿ ಬ್ಲಾಕ್ ಮಾಡಿದೆ.
ಕೇಂದ್ರ ಗೃಹ ರಾಜ್ಯ ಖಾತೆ ಸಚಿವ ಬಂಡಿ ಸಂಜಯ್ ಕುಮಾರ್ ಅವರು ಈ ಬಗ್ಗೆ ಮಾಹಿತಿ ಕೊಟ್ಟಿದ್ದು, ಸಿಟಿಜಿನ್ ಫೈನಾನ್ಸಿಷಿಯಲ್ ಫ್ರಾಡ್ ರಿಪೋರ್ಟಿಂಗ್ ಮತ್ತು ಮ್ಯಾನೆಜ್ಮೆಂಟ್ ಸಿಸ್ಟಮ್ನ್ನು 14 ಸಿ ಅಡಿಯಲ್ಲಿ 2021ರಲ್ಲಿ ಲಾಂಚ್ ಮಾಡಲಾಗಿತ್ತು. ಹಣಕಾಸಿನ ವಂಚನೆ ನಡೆದಾಗಲೆಲ್ಲಾ ಕೂಡಲೇ ಕ್ರಮ ಕೈಗೊಂಡು ನಾಗರಿಕರ ಹಣವನ್ನು ಉಳಿಸಲಾಗಿದೆ. ಈ ಒಂದು ಇಲಾಖೆಗೆ ಒಟ್ಟು 9.94 ಲಕ್ಷ ದೂರುಗಳು ಬಂದಿದ್ದವು. ದೂರಿನನ್ವಯ ಒಟ್ಟು 3,431 ಕೋಟಿ ರೂಪಾಯಿ ನಾಗರಿಕರ ಹಣವನ್ನು ಸುರಕ್ಷಿತವಾಗಿ ಕಾಪಾಡಲಾಗಿದೆ ಎಂದರು.
14ಸಿ ಸದ್ಯ ಡಿಜಿಟಲ್ ವಂಚನೆಯನ್ನು ಮಾಡುತ್ತಿದ್ದ 1700 ಸ್ಕೈಪ್ ಐಡಿಗಳನ್ನು ಹಾಗೂ 59 ಸಾವಿರ ವಾಟ್ಸಾಪ್ ಖಾತೆಗಳನ್ನು ಗುರುತಿಸಿ ಅವುಗಳನ್ನು ಸದಾಕಾಲಕ್ಕೆ ಬ್ಲಾಕ್ ಮಾಡಲಾಗಿದೆ ಎಂದು ಸಂಜಯ್ ಕುಮಾರ್ ಹೇಳಿದ್ದಾರೆ.
ನವೆಂಬರ್ 15 2024ರವರೆಗೆ ಒಟ್ಟು 6.69 ಲಕ್ಷ ಸಿಮ್ಕಾರ್ಡ್ ಹಾಗೂ 1.32 ಲಕ್ಷ ಐಎಇಐ ನಂಬರ್ಗಳನ್ನು ಪೊಲೀಸ್ ಅಧಿಕಾರಿಗಳು ವರದಿ ಮಾಡಿದ್ದರು. ಅವುಗಳನ್ನೆಲ್ಲಾ ಈಗ ಬ್ಲಾಕ್ ಮಾಡಲಾಗಿದೆ ಎಂದು ಹೇಳಿದ್ದಾರೆ.
ಗೃಹ ಸಚಿವಾಲಯ ಸೈಬರ್ ಕ್ರೈಂ ಹಾಗೂ ಡಿಜಿಟಲ್ ಪ್ರಾಡ್ಗಳನ್ನ ತಡೆಹಿಡಿಯುವಲ್ಲಿ ವ್ಯವಸ್ಥೆಯನ್ನು ಮತ್ತಷ್ಟು ಬಲಿಷ್ಠಗೊಳಿಸುವ ನಿಟ್ಟಿನಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಕೇಂದ್ರ ಸರ್ಕಾರ ಹಾಗೂ ಟಿಲಿಕಾಂ ಸರ್ವಿಸ್ ಪ್ರೊವೈಡರ್ಸ್ ಅಂತಾರಾಷ್ಟ್ರೀಯ ವಂಚನೆಯ ಕರೆಗಳನ್ನು ಗುರುತಿಸುವ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ. ಇತ್ತೀಚಿನ ಡಿಜಿಟಲ್ ಅರೆಸ್ಟ್ ಪ್ರಕರಣಗಳಲ್ಲಿ ಸೈಬರ್ ವಂಚಕರು ಇಂತಹ ಕರೆಗಳ ಸಹಾಯದಿಂದ ಜನರನ್ನು ವಂಚಿಸುತ್ತಿರುವುದು ಕಂಡು ಬಂದಿದೆ ಹೀಗಾಗಿ ಕ್ರಮ ಕೈಗೊಳ್ಳಲಾಗಿದೆ ಎಂದರು.
ನಿಮ್ಮ ಪ್ರತಿಕ್ರಿಯೆ ಏನು?
