ಟ್ರಂಪ್ ಮತ್ತೊಮ್ಮೆ ಅಮೆರಿಕ ಅಧ್ಯಕ್ಷರಾದರೆ ಭಾರತಕ್ಕೆ ಭರ್ಜರಿ ಲಾಭ! ಚೀನಾಗೆ ಬೀಳಲಿದೆ ಹೊಡೆತ

ಟ್ರಂಪ್ ಮತ್ತೊಮ್ಮೆ ಅಮೆರಿಕ ಅಧ್ಯಕ್ಷರಾದರೆ ಭಾರತಕ್ಕೆ ಭರ್ಜರಿ ಲಾಭ! ಚೀನಾಗೆ ಬೀಳಲಿದೆ ಹೊಡೆತ

 2024ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಈ ಬಾರಿ ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಹಾಗೂ ಅಮೆರಿಕ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಗೆಲುವು ಸಾಧಿಸಿ ಮತ್ತೊಮ್ಮೆ ಅಮೆರಿಕದ ಅಧ್ಯಕ್ಷ ಪಟ್ಟಕ್ಕೆ ಏರಿದರೆ ಭಾರತಕ್ಕೆ ಸಾಕಷ್ಟು ಅನುಕೂಲ ಆಗಲಿದೆ ಎಂದು ಜಾಗತಿಕ ಮಾರುಕಟ್ಟೆ ಸಂಶೋಧನಾ ಸಂಸ್ಥೆ ನೋಮುರಾ ಹೇಳಿದೆ. ಈ ಕುರಿತಾಗಿ ಸಂಶೋಧನಾ ಸಂಸ್ಥೆ ತನ್ನ ಸಂಶೋಧನಾ ವರದಿ ಪ್ರಕಟ ಮಾಡಿದ್ದು, ಟ್ರಂಪ್ ಅಧ್ಯಕ್ಷರಾದ ಬಳಿಕ ರೂಪಿಸಬಹುದಾದ ನೀತಿಗಳು ಭಾರತದ ಪಾಲಿಗೆ ಲಾಭದಾಯಕ ಆಗಲಿದೆ ಎಂದು ವಿಶ್ಲೇಷಿಸಿದೆ.

ಭಾರತದ ವಿದೇಶಾಂಗ ನೀತಿ ಅಮೆರಿಕದ ವಿದೇಶಾಂಗ ನೀತಿಗೆ ಪೂರಕವಾಗಿದೆ. ಭಾರತ ಹಾಗೂ ಅಮೆರಿಕಗಳ ಆಂತರಿಕ ಬೇಡಿಕೆಗಳು, ಅಭಿವೃದ್ಧಿಯ ಮಾದರಿ ಹಾಗೂ ಭಾರತದಲ್ಲಿನ ಅಗತ್ಯ ವಸ್ತುಗಳ ಕಡಿಮೆ ಬೆಲೆ ಹಾಗೂ ಸರಕು ಸಾಗಣೆ ಸಂಗ್ರಹ ಜಾಲದ ಅಭಿವೃದ್ದಿಯಿಂದಾಗಿ ಭಾರತಕ್ಕೆ ಪೂರಕವಾಗಿ ಅಮೆರಿಕ ತನ್ನ ನೀತಿಗಳನ್ನು ರೂಪಿಸಬಹುದಾಗಿದೆ ಎಂದು ಸಂಸ್ಥೆಯ ವರದಿ ಅಭಿಪ್ರಾಯಪಟ್ಟಿದೆ.

ಜಾಗತಿಕ ಕಾರ್ಯತಂತ್ರ ಹಾಗೂ ಆರ್ಥಿಕಾಭಿವೃದ್ದಿ ವಿಚಾರದಲ್ಲಿ ಭಾರತ ಹಾಗೂ ಅಮೆರಿಕ ದೇಶಗಳೆರಡೂ ತುಂಬಾನೇ ಆಳವಾದ ನಂಟು ಹೊಂದಿವೆ. ಯಾವುದೇ ವಿಚಾರದಲ್ಲಿ ಎರಡೂ ದೇಶಗಳು ರಾಜಿ ಮಾಡಿಕೊಳ್ಳುವಂಥಾ ಸನ್ನಿವೇಶದಲ್ಲಿ ಇಲ್ಲ. ಒಂದು ವೇಳೆ ಅಮೆರಿಕ ಅಧ್ಯಕ್ಷೀಯ ಚುನಾವಣಾ ಫಲಿತಾಂಶ ಯಾವ ರೀತಿಯಲ್ಲೇ ಬಂದರೂ ಭಾರತಕ್ಕೆ ಲಾಭ ಆಗಲಿದೆ. ಡೆಮಾಕ್ರೆಟಿಕ್ ಪಕ್ಷದ ಅಭ್ಯರ್ಥಿ ಕಮಲಾ ಹ್ಯಾರಿಸ್ ಅವರು ಗೆದ್ದರೂ ಭಾರತಕ್ಕೆ ಲಾಭವಾಗಲಿದೆ. ಆದರೆ ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ ಗೆದ್ದರೆ ಅವರು ರೂಪಿಸುವ ನೀತಿಗಳು ಭಾರತಕ್ಕೆ ಭರ್ಜರಿ ಲಾಭ ತಂದು ಕೊಡಲಿವೆ ಎಂದು ವರದಿ ಹೇಳಿದೆ.

ವಿದೇಶಾಂಗ ನೀತಿ ವಿಚಾರಕ್ಕೆ ಬಂದರೆ ಅಮೆರಿಕ ದೇಶಕ್ಕೆ ಚೀನಾ ದೇಶವನ್ನು ಹಿಮ್ಮೆಟ್ಟಿಸಲು ಹಾಗೂ ನಿಯಂತ್ರಿಸಲು ಭಾರತ ದೇಶವು ಪರ್ಯಾಯ ಆಯ್ಕೆಯಾಗಿದೆ. ಭಾರತದಲ್ಲಿ ಆಂತರಿಕ ಬೇಡಿಕೆ ಆಧರಿತ ಆರ್ಥಿಕತೆ ಇದೆ. ಹೀಗಾಗಿ, ಭಾರತದ ಜೊತೆಗಿನ ನಂಟು ಅಮೆರಿಕದ ಆರ್ಥಿಕ ಕುಸಿತವನ್ನು ತಡೆದು ಅಮೆರಿಕದ ಅಭಿವೃದ್ದಿ ವೇಗಕ್ಕೆ ನೆರವಾಗಲಿದೆ ಎಂದು ಸಮೀಕ್ಷಾ ವರದಿ ಹೇಳಿದೆ.

ವೆಬ್ ಡೆಸ್ಕ್
ಫೋಕಸ್ ಕರ್ನಾಟಕ